ਸੰਖੇਪ ਜਾਣਕਾਰੀ
Read the full fact sheet- ਗਰਮੀ ਆਸਟ੍ਰੇਲੀਆ ਵਿੱਚ ਹੋਣ ਵਾਲੀਆਂ ਕਿਸੇ ਵੀ ਹੋਰ ਕੁਦਰਤੀ ਆਫ਼ਤਾਂ ਨਾਲੋਂ ਵੱਧ ਮੌਤਾਂ ਦਾ ਕਾਰਨ ਬਣਦੀ ਹੈ।
- ਗਰਮੀ ਗੰਭੀਰ ਅਤੇ ਸੰਭਾਵੀ ਤੌਰ 'ਤੇ ਜਾਨਲੇਵਾ ਸਿਹਤ ਸਮੱਸਿਆਵਾਂ ਦਾ ਕਾਰਨ ਬਣ ਸਕਦੀ ਹੈ, ਜਿਵੇਂ ਕਿ ਗਰਮੀ ਨਾਲ ਥਕਾਵਟ (ਹੀਟ ਏਗਜ਼ੌਸ਼ਨ) ਅਤੇ ਹੀਟਸਟ੍ਰੋਕ, ਦਿਲ ਦਾ ਦੌਰਾ ਜਾਂ ਦਿਮਾਗ ਦਾ ਦੌਰਾ ਵਰਗੀਆਂ ਅਚਾਨਕ ਘਟਨਾਵਾਂ ਨੂੰ ਸ਼ੁਰੂ ਕਰ ਸਕਦੀ ਹੈ, ਜਾਂ ਗੁਰਦੇ ਜਾਂ ਫੇਫੜਿਆਂ ਦੀ ਬਿਮਾਰੀ ਅਤੇ ਮਾਨਸਿਕ ਬਿਮਾਰੀ ਵਰਗੀਆਂ ਮੌਜੂਦਾ ਡਾਕਟਰੀ ਸਮੱਸਿਆਵਾਂ ਨੂੰ ਹੋਰ ਵਿਗਾੜ ਸਕਦੀ ਹੈ।
- ਬਹੁਤ ਜ਼ਿਆਦਾ ਗਰਮੀ ਕਿਸੇ ਨੂੰ ਵੀ ਪ੍ਰਭਾਵਿਤ ਕਰ ਸਕਦੀ ਹੈ। ਹਾਲਾਂਕਿ, ਜਿਨ੍ਹਾਂ ਲੋਕਾਂ ਨੂੰ ਜ਼ਿਆਦਾ ਖ਼ਤਰਾ ਹੈ ਉਨ੍ਹਾਂ ਵਿੱਚ 65 ਸਾਲ ਤੋਂ ਵੱਧ ਉਮਰ ਦੇ ਲੋਕ, ਨਵਜਨਮੇ ਬੱਚੇ ਅਤੇ ਛੋਟੇ ਬੱਚੇ, ਗਰਭਵਤੀ ਔਰਤਾਂ, ਗੰਭੀਰ ਜਾਂ ਪੁਰਾਣੀਆਂ ਸਿਹਤ ਸਮੱਸਿਆਵਾਂ ਵਾਲੇ ਲੋਕ, ਸਮਾਜਿਕ ਤੌਰ 'ਤੇ ਇਕੱਲੇ ਰਹਿਣ ਵਾਲੇ ਲੋਕ ਅਤੇ ਠੰਡਾ ਰਹਿਣ ਦੇ ਸੀਮਤ ਸਾਧਨਾਂ ਵਾਲੇ ਲੋਕ ਸ਼ਾਮਲ ਹਨ।
- ਮੈਡੀਕਲ ਐਮਰਜੈਂਸੀ, ਜਿਵੇਂ ਕਿ ਹੀਟਸਟ੍ਰੋਕ ਜਾਂ ਹੋਰ ਗੰਭੀਰ ਡਾਕਟਰੀ ਸਥਿਤੀ ਵਿੱਚ, ਤੁਰੰਤ ਟ੍ਰਿਪਲ ਜ਼ੀਰੋ (000) ‘ਤੇ ਫ਼ੋਨ ਕਰੋ।
- ਠੰਡਾ ਰਹਿ ਕੇ, ਖ਼ੂਬ ਪਾਣੀ ਪੀ ਕੇ, ਅਗਾਊਂ ਯੋਜਨਾ ਬਣਾ ਕੇ ਅਤੇ ਦੂਜਿਆਂ ਨਾਲ ਸੰਪਰਕ ਵਿੱਚ ਰਹਿ ਕੇ ਆਪਣੇ ਆਪ ਨੂੰ ਅਤੇ ਦੂਜਿਆਂ ਨੂੰ ਬਚਾਉਣ ਲਈ ਕਦਮ ਚੁੱਕੋ।
On this page
ਗਰਮੀ ਨਾਲ ਸੰਬੰਧਿਤ ਸਿਹਤ ਸਮੱਸਿਆਵਾਂ
ਗਰਮੀ ਆਸਟ੍ਰੇਲੀਆ ਵਿੱਚ ਹੋਣ ਵਾਲੀਆਂ ਕਿਸੇ ਵੀ ਹੋਰ ਕੁਦਰਤੀ ਆਫ਼ਤਾਂ ਨਾਲੋਂ ਵੱਧ ਮੌਤਾਂ ਦਾ ਕਾਰਨ ਬਣਦੀ ਹੈ।
ਗਰਮੀ ਗੰਭੀਰ ਅਤੇ ਸੰਭਾਵੀ ਤੌਰ 'ਤੇ ਜਾਨਲੇਵਾ ਸਿਹਤ ਸਮੱਸਿਆਵਾਂ ਦਾ ਕਾਰਨ ਬਣ ਸਕਦੀ ਹੈ, ਜਿਵੇਂ ਕਿ ਗਰਮੀ ਕਾਰਨ ਥਕਾਵਟ (ਹੀਟ ਏਗਜ਼ੌਸ਼ਨ) ਅਤੇ ਹੀਟਸਟ੍ਰੋਕ, ਦਿਲ ਦਾ ਦੌਰਾ ਜਾਂ ਦਿਮਾਗ ਦਾ ਦੌਰਾ ਵਰਗੀਆਂ ਅਚਾਨਕ ਘਟਨਾਵਾਂ ਨੂੰ ਸ਼ੁਰੂ ਕਰ ਸਕਦੀ ਹੈ, ਜਾਂ ਗੁਰਦੇ ਜਾਂ ਫੇਫੜਿਆਂ ਦੀ ਬਿਮਾਰੀ ਅਤੇ ਮਾਨਸਿਕ ਬਿਮਾਰੀ ਵਰਗੀਆਂ ਮੌਜੂਦਾ ਡਾਕਟਰੀ ਸਮੱਸਿਆਵਾਂ ਨੂੰ ਹੋਰ ਵਿਗਾੜ ਸਕਦੀ ਹੈ।
ਗਰਮੀ ਨਾਲ ਸੰਬੰਧਿਤ ਸਿਹਤ ਸਮੱਸਿਆਵਾਂ ਦਾ ਵਧੇਰੇ ਖ਼ਤਰਾ ਕਿੰਨ੍ਹਾ ਨੂੰ ਹੁੰਦਾ ਹੈ
ਬਹੁਤ ਜ਼ਿਆਦਾ ਗਰਮੀ ਕਿਸੇ ਨੂੰ ਵੀ ਪ੍ਰਭਾਵਿਤ ਕਰ ਸਕਦੀ ਹੈ। ਗਰਮੀ ਨਾਲ ਸੰਬੰਧਿਤ ਸਿਹਤ ਸਮੱਸਿਆਵਾਂ ਦੇ ਵਧੇਰੇ ਖ਼ਤਰੇ ਵਾਲਿਆਂ ਵਿੱਚ ਹੇਠ ਲਿਖੇ ਲੋਕ ਸ਼ਾਮਲ ਹਨ:
- 65 ਸਾਲ ਤੋਂ ਵੱਧ ਉਮਰ ਦੇ ਲੋਕ
- ਨਵਜੰਮੇ ਬੱਚੇ ਅਤੇ ਛੋਟੇ ਬੱਚੇ
- ਗਰਭਵਤੀ ਔਰਤਾਂ
- ਉਹ ਵਿਅਕਤੀ ਜਿਨ੍ਹਾਂ ਨੂੰ ਪਹਿਲਾਂ ਹੀ ਕੋਈ ਡਾਕਟਰੀ ਸਮੱਸਿਆ ਹੋਵੇ, ਜਿਵੇਂ ਕਿ ਦਿਲ ਦੀ ਬਿਮਾਰੀ, ਗੁਰਦਿਆਂ ਦੀ ਬਿਮਾਰੀ, ਸ਼ੂਗਰ ਰੋਗ, ਜਾਂ ਮਾਨਸਿਕ ਬੀਮਾਰੀ
- ਉਹ ਵਿਅਕਤੀ ਜੋ ਕੁੱਝ ਖ਼ਾਸ ਦਵਾਈਆਂ ਲੈਂਦੇ ਹੋਣ, ਜਿਵੇਂ ਕਿ ਪਿਸ਼ਾਬ ਵਧਾਉਣ ਵਾਲੀਆਂ ਗੋਲੀਆਂ (ਤਰਲ ਗੋਲੀਆਂ) ਜਾਂ ਐਂਟੀਕੋਲਾਈਨਰਜਿਕ ਪ੍ਰਭਾਵ ਵਾਲੀਆਂ ਦਵਾਈਆਂ
- ਉਹ ਲੋਕ ਜੋ ਘਰੋਂ ਬਾਹਰ ਕੰਮ ਕਰਦੇ ਹਨ ਜਾਂ ਕਸਰਤ ਕਰਦੇ ਹਨ
- ਉਹ ਲੋਕ ਜੋ ਸਮਾਜਿਕ ਤੌਰ 'ਤੇ ਇਕੱਲੇ ਹਨ ਜਾਂ ਇਕੱਲੇ ਰਹਿੰਦੇ ਹਨ
- ਉਹ ਵਿਅਕਤੀ ਜਿਨ੍ਹਾਂ ਕੋਲ ਠੰਡਾ ਰਹਿਣ ਦੇ ਥੋੜ੍ਹੇ ਹੀ ਤਰੀਕੇ ਹਨ ਜਾਂ ਜੋ ਅਜਿਹੀਆਂ ਇਮਾਰਤਾਂ ਵਿੱਚ ਰਹਿੰਦੇ ਹਨ ਜੋ ਆਸਾਨੀ ਨਾਲ ਗਰਮ ਹੋ ਜਾਂਦੀਆਂ ਹਨ
- ਉਹ ਲੋਕ ਜੋ ਬੇਘਰ ਹਨ।
ਗਰਮੀ ਨਾਲ ਸੰਬੰਧਿਤ ਸਿਹਤ ਸਮੱਸਿਆਵਾਂ ਹੋਣ ਦੇ ਕਾਰਨ
ਗਰਮੀ ਨਾਲ ਸੰਬੰਧਿਤ ਸਿਹਤ ਸਮੱਸਿਆਵਾਂ ਉਦੋਂ ਹੁੰਦੀਆਂ ਹਨ, ਜਦੋਂ ਸਾਡਾ ਸਰੀਰ ਜ਼ਰੂਰਤ ਤੋਂ ਵੱਧ ਗਰਮ ਹੋ ਜਾਂਦਾ ਹੈ ਜਾਂ ਪਸੀਨਾ ਆਉਣ ਕਰਕੇ ਪਾਣੀ ਦੀ ਘਾਟ ਹੋ ਜਾਂਦੀ ਹੈ ਜਾਂ ਦੋਹਾਂ ਚੀਜ਼ਾਂ ਇਕੱਠੀਆਂ ਹੋ ਜਾਂਦੀਆਂ ਹਨ।
ਠੰਡਾ ਰਹਿਣ ਅਤੇ ਕਾਫ਼ੀ ਪਾਣੀ ਪੀਣ ਵਰਗੇ ਸੁਰੱਖਿਆ ਉਪਾਅ ਗਰਮੀ ਨਾਲ ਸੰਬੰਧਿਤ ਸਿਹਤ ਸਮੱਸਿਆਵਾਂ ਦੇ ਖ਼ਤਰੇ ਨੂੰ ਘਟਾ ਸਕਦੇ ਹਨ।
ਵਧੇਰੇ ਜਾਣਕਾਰੀ ਲਈ ਬਹੁਤ ਜ਼ਿਆਦਾ ਗਰਮੀ ਵਿੱਚ ਸੁਰੱਖਿਅਤ ਕਿਵੇਂ ਰਹਿਣਾ ਹੈ ਪੰਨੇ ਨੂੰ ਵੇਖੋ।
ਗਰਮੀ ਨਾਲ ਸੰਬੰਧਿਤ ਸਿਹਤ ਸਮੱਸਿਆਵਾਂ ਦੇ ਲੱਛਣ ਅਤੇ ਮੁੱਢਲੀ ਸਹਾਇਤਾ
ਗਰਮੀ ਨਾਲ ਸੰਬੰਧਿਤ ਸਿਹਤ ਸਮੱਸਿਆਵਾਂ ਦੇ ਸੰਕੇਤਾਂ ਅਤੇ ਲੱਛਣਾਂ ਨੂੰ ਜਾਣਨਾ ਅਤੇ ਇਨ੍ਹਾਂ ਉੱਤੇ ਕਿਵੇਂ ਕਾਰਵਾਈ ਕਰਨੀ ਹੈ, ਇਹ ਜਾਣਨਾ ਅਹਿਮ ਹੈ।
ਜੇਕਰ ਕਿਸੇ ਵਿਅਕਤੀ ਵਿੱਚ ਗਰਮੀ ਕਾਰਨ ਥਕਾਵਟ (ਹੀਟ ਏਗਜ਼ੌਸ਼ਨ), ਹੀਟਸਟ੍ਰੋਕ ਜਾਂ ਕਿਸੇ ਹੋਰ ਸਿਹਤ ਐਮਰਜੈਂਸੀ ਦੇ ਲੱਛਣ ਦਿਖਾਈ ਦਿੰਦੇ ਹਨ ਤਾਂ ਤੁਰੰਤ ਮੁੱਢਲੀ ਸਹਾਇਤਾ ਦਿਓ ਅਤੇ ਡਾਕਟਰੀ ਸਹਾਇਤਾ ਲਓ।
ਪਾਣੀ ਦੀ ਘਾਟ (ਡੀਹਾਈਡ੍ਰੇਸ਼ਨ)
ਜਦੋਂ ਸਰੀਰ ਕੋਲ ਆਪਣੀਆਂ ਆਮ ਕੰਮਕਾਜੀ ਕਾਰਵਾਈਆਂ ਚਲਾਉਣ ਲਈ ਲੋੜੀਂਦੇ ਤਰਲ ਪਦਾਰਥ ਨਹੀਂ ਹੁੰਦੇ, ਤਾਂ ਡੀਹਾਈਡ੍ਰੇਸ਼ਨ ਹੋ ਜਾਂਦੀ ਹੈ।
ਇਸ ਦੀਆਂ ਨਿਸ਼ਾਨੀਆਂ ਅਤੇ ਲੱਛਣਾਂ ਵਿੱਚ ਸ਼ਾਮਲ ਹਨ:
- ਪਿਆਸ ਲੱਗਣਾ
- ਮੂੰਹ ਸੁੱਕਣਾ
- ਚੱਕਰ ਆਉਣਾ ਜਾਂ ਸਿਰ ਦਰਦ
- ਸੁਸਤੀ ਜਾਂ ਥਕਾਵਟ
- ਠੀਕ ਢੰਗ ਨਾਲ ਸੋਚਣ ਵਿੱਚ ਮੁਸ਼ਕਲ ਹੋਣਾ
- ਆਮ ਨਾਲੋਂ ਘੱਟ ਪਿਸ਼ਾਬ ਆਉਣਾ
- ਪਿਸ਼ਾਬ ਦਾ ਰੰਗ ਗੂੜ੍ਹਾ ਹੋਣਾ ਜਾਂ ਤੇਜ਼ ਗੰਧ ਵਾਲਾ ਪਿਸ਼ਾਬ ਹੋਣਾ।
ਗਰਮੀ ਕਾਰਨ ਪਾਣੀ ਦੀ ਘਾਟ ਹੋਣ ਲਈ ਮੁੱਢਲੀ ਸਹਾਇਤਾ ਦੇਣ ਵਿੱਚ ਹੱਥ ਲਿਖੇ ਸ਼ਾਮਲ ਹਨ:
- ਠੰਢੀ ਥਾਂ 'ਤੇ ਜਾਓ ਅਤੇ ਆਰਾਮ ਕਰੋ।
- ਕੱਪੜੇ ਉਤਾਰੋ ਅਤੇ ਚਮੜੀ ਨੂੰ ਠੰਡੇ ਪਾਣੀ ਨਾਲ ਗਿੱਲਾ ਕਰੋ।
- ਖ਼ੂਬ ਸਾਰਾ ਪਾਣੀ ਪੀਓ।
ਜੇਕਰ ਲੱਛਣਾਂ ਵਿੱਚ ਸੁਧਾਰ ਨਹੀਂ ਹੁੰਦਾ, ਤਾਂ ਉਹ ਵਿਅਕਤੀ ਆਪਣੇ GP ਨੂੰ ਮਿਲ ਸਕਦਾ ਹੈ ਜਾਂ 24 ਘੰਟੇ ਸਿਹਤ ਸਲਾਹ ਲਈ 1300 60 60 24 'ਤੇ ਨਰਸ-ਔਨ-ਕਾਲ 'ਤੇ ਫ਼ੋਨ ਕਰ ਸਕਦਾ ਹੈ ਜਾਂ ਵਿਕਟੋਰੀਅਨ ਵਰਚੁਅਲ ਐਮਰਜੈਂਸੀ ਵਿਭਾਗ ਨਾਲ ਸੰਪਰਕ ਕਰ ਸਕਦਾ ਹੈ।
ਗਰਮੀ ਨਾਲ ਹੋਣ ਵਾਲੇ ਕੜਵੱਲ
ਗਰਮੀ ਕਾਰਨ ਕੜਵੱਲ ਉਦੋਂ ਪੈਂਦੇ ਹਨ, ਜਦੋਂ ਸਰੀਰ ਬਹੁਤ ਜ਼ਿਆਦਾ ਪਸੀਨਾ ਆਉਣ ਅਤੇ ਸਰੀਰਕ ਗਤੀਵਿਧੀ ਕਰਨ ਕਾਰਨ ਨਮਕ ਅਤੇ ਪਾਣੀ ਗੁਆ ਦਿੰਦਾ ਹੈ। ਗਰਮੀ ਕਾਰਨ ਥਕਾਵਟ (ਹੀਟ ਏਗਜ਼ੌਸ਼ਨ) ਨਾਲ ਪੈਣ ਵਾਲੇ ਕੜਵੱਲ ਗਰਮੀ ਦੀ ਥਕਾਵਟ ਦੇ ਲੱਛਣ ਵੀ ਹੋ ਸਕਦੇ ਹਨ।
ਲੱਛਣਾਂ ਵਿੱਚ ਆਮ ਤੌਰ 'ਤੇ ਪੇਟ, ਬਾਂਹਾਂ ਜਾਂ ਲੱਤਾਂ ਵਿੱਚ ਮਾਸਪੇਸ਼ੀਆਂ ਵਿੱਚ ਦਰਦ ਜਾਂ ਕੜਵੱਲ ਪੈਣੇ ਸ਼ਾਮਲ ਹਨ।
ਗਰਮੀ ਨਾਲ ਹੋਣ ਵਾਲੇ ਕੜਵੱਲਾਂ ਲਈ ਮੁੱਢਲੀ ਸਹਾਇਤਾ ਵਿੱਚ ਹੇਠ ਲਿਖੇ ਸ਼ਾਮਲ ਹਨ:
- ਕਿਸੇ ਵੀ ਕੀਤੀ ਜਾ ਰਹੀ ਗਤੀਵਿਧੀ ਨੂੰ ਤੁਰੰਤ ਰੋਕੋ।
- ਠੰਢੇ ਜਾਂ ਛਾਂ ਵਾਲੇ ਖੇਤਰ ਵਿੱਚ ਆਰਾਮ ਕਰੋ ਅਤੇ ਲੱਤਾਂ ਨੂੰ ਸਹਾਰਾ ਦੇਵੋ ਜਾਂ ਥੋੜ੍ਹਾ ਜਿਹਾ ਉੱਚਾ ਰੱਖੋ।
- ਠੰਡਾ ਪਾਣੀ ਪੀਓ।
- ਉਸ ਗਤੀਵਿਧੀ ਨੂੰ ਦੁਬਾਰਾ ਕਰਨ ਤੋਂ ਪਹਿਲਾਂ ਕੁੱਝ ਘੰਟੇ ਆਰਾਮ ਕਰੋ।
ਜੇਕਰ ਲੱਛਣਾਂ ਵਿੱਚ ਸੁਧਾਰ ਨਹੀਂ ਹੁੰਦਾ, ਤਾਂ ਡਾਕਟਰੀ ਸਹਾਇਤਾ ਲਓ। ਆਪਣੇ GP ਨੂੰ ਮਿਲੋ ਜਾਂ 24 ਘੰਟੇ ਉਪਲਬਧ ਸਿਹਤ ਸਲਾਹ ਲਈ ਨਰਸ-ਔਨ-ਕਾਲ ਨੂੰ 1300 60 60 24 'ਤੇ ਫ਼ੋਨ ਕਰੋ।
ਗਰਮੀ ਕਾਰਨ ਥਕਾਵਟ
ਗਰਮੀ ਕਾਰਨ ਥਕਾਵਟ ਉਦੋਂ ਹੁੰਦੀ ਹੈ ਜਦੋਂ ਸਰੀਰ ਬਹੁਤ ਜ਼ਿਆਦਾ ਗਰਮ ਹੋ ਜਾਂਦਾ ਹੈ ਅਤੇ ਡੀਹਾਈਡ੍ਰੇਟ ਹੋ ਜਾਂਦਾ ਹੈ, ਆਮ ਤੌਰ 'ਤੇ ਬਹੁਤ ਜ਼ਿਆਦਾ ਪਸੀਨਾ ਆਉਣ ਜਾਂ ਸਰੀਰਕ ਗਤੀਵਿਧੀ ਕਾਰਨ। ਇਹ ਇੱਕ ਗੰਭੀਰ ਹਾਲਤ ਹੈ ਜੋ ਹੀਟਸਟ੍ਰੋਕ ਵੱਲ ਵੱਧ ਸਕਦੀ ਹੈ।
ਗਰਮੀ ਕਾਰਨ ਥਕਾਵਟ ਦੀਆਂ ਨਿਸ਼ਾਨੀਆਂ ਅਤੇ ਲੱਛਣਾਂ ਵਿੱਚ ਇਹ ਸ਼ਾਮਲ ਹਨ:
- ਪਿਆਸ ਜਾਂ ਚਿੜਚਿੜਾਪਨ ਮਹਿਸੂਸ ਹੋਣਾ
- ਕਮਜ਼ੋਰੀ ਜਾਂ ਬੇਹੋਸ਼ੀ ਮਹਿਸੂਸ ਹੋਣਾ
- ਚੱਕਰ ਆਉਣਾ, ਸਿਰਦਰਦ
- ਜੀ ਕੱਚਾ ਹੋਣਾ ਅਤੇ ਉਲਟੀਆਂ
- ਮਾਸਪੇਸ਼ੀਆਂ ਵਿੱਚ ਕੜਵੱਲ ਪੈਣਾ
- ਬਹੁਤ ਜ਼ਿਆਦਾ ਪਸੀਨਾ ਆਉਣਾ
- ਰੰਗ ਫਿੱਕਾ ਪੈਣਾ
- ਆਮ ਨਾਲੋਂ ਘੱਟ ਪਿਸ਼ਾਬ ਆਉਣਾ।
ਗਰਮੀ ਕਾਰਨ ਥਕਾਵਟ ਲਈ ਮੁੱਢਲੀ ਸਹਾਇਤਾ ਵਿੱਚ ਇਹ ਸ਼ਾਮਲ ਹਨ:
- ਠੰਢੀ ਥਾਂ ਵਿੱਚ ਲੱਤਾਂ ਨੂੰ ਸਹਾਰਾ ਦੇ ਕੇ ਅਤੇ ਥੋੜ੍ਹਾ ਜਿਹਾ ਉੱਚਾ ਕਰਕੇ ਲੇਟ ਜਾਓ ਅਤੇ ਆਰਾਮ ਕਰੋ।
- ਵਾਧੂ ਕੱਪੜੇ ਉਤਾਰ ਦਿਓ ਜਾਂ ਤੰਗ ਕੱਪੜੇ ਢਿੱਲੇ ਕਰ ਦਿਓ।
- ਠੰਢੇ ਪਾਣੀ ਦਾ ਛਿੜਕਾਅ ਕਰਕੇ ਉਸ ਵਿਅਕਤੀ ਨੂੰ ਠੰਢਾ ਕਰੋ; ਸਰੀਰ ਨੂੰ ਠੰਢੀ, ਗਿੱਲੀ ਸਪੰਜ ਜਾਂ ਕੱਪੜਾ ਲਗਾਓ; ਅਤੇ ਗਰਦਨ, ਕੂਲ੍ਹਿਆਂ ਜਾਂ ਕੱਛਾਂ ਵਿੱਚ ਗਿੱਲੇ ਤੌਲੀਏ ਵਿੱਚ ਆਈਸ ਪੈਕ ਜਾਂ ਕੁਚਲੀ ਹੋਈ ਬਰਫ਼ ਲਗਾਓ। ਜੇਕਰ ਸੰਭਵ ਹੋਵੇ ਤਾਂ ਵਿਅਕਤੀ ਨੂੰ ਪੱਖਾ ਲਗਾਓ। ਜੇਕਰ ਉਹ ਵਿਅਕਤੀ ਕਰ ਸਕਦਾ ਹੋਵੇ, ਤਾਂ ਉਸਨੂੰ ਠੰਢੇ ਪਾਣੀ ਨਾਲ ਸ਼ਾਵਰ ਲੈਣ ਜਾਂ ਨਹਾਉਣ ਲਈ ਕਹੋ।
- ਜੇਕਰ ਉਲਟੀ ਨਹੀਂ ਆ ਰਹੀ, ਤਾਂ ਠੰਢੇ ਪਾਣੀ ਦੇ ਘੁੱਟ ਵਾਰ-ਵਾਰ ਪੀਣ ਲਈ ਕਹੋ।
ਜੇਕਰ ਲੱਛਣਾਂ ਵਿੱਚ ਸੁਧਾਰ ਨਹੀਂ ਹੁੰਦਾ, ਤਾਂ ਡਾਕਟਰੀ ਸਹਾਇਤਾ ਲਓ। GP ਨੂੰ ਮਿਲੋ, ਵਿਕਟੋਰੀਆ ਦੇ ਵਰਚੁਅਲ ਐਮਰਜੈਂਸੀ ਵਿਭਾਗ ਨਾਲ ਸੰਪਰਕ ਕਰੋ ਜਾਂ ਐਮਰਜੈਂਸੀ ਵਿਭਾਗ ਵਿੱਚ ਜਾਓ।
ਜੇਕਰ ਲੱਛਣ ਵਿਗੜ ਜਾਂਦੇ ਹਨ ਜਾਂ ਤੁਸੀਂ ਹੀਟਸਟ੍ਰੋਕ ਬਾਰੇ ਚਿੰਤਤ ਹੋ, ਟ੍ਰਿਪਲ ਜ਼ੀਰੋ (000) 'ਤੇ ਫ਼ੋਨ ਕਰੋ।
ਹੀਟਸਟ੍ਰੋਕ
ਹੀਟਸਟ੍ਰੋਕ ਇੱਕ ਗੰਭੀਰ ਅਤੇ ਸੰਭਾਵਿਤ ਤੌਰ 'ਤੇ ਜਾਨਲੇਵਾ ਸਿਹਤ ਸਮੱਸਿਆ ਹੁੰਦੀ ਹੈ ਜੋ ਉਦੋਂ ਹੁੰਦੀ ਹੈ ਜਦੋਂ ਸਰੀਰ ਖ਼ਤਰਨਾਕ ਪੱਧਰ ਤੱਕ ਗਰਮ ਹੋ ਜਾਂਦਾ ਹੈ ਅਤੇ ਅੰਗਾਂ ਦੇ ਕੰਮਕਾਜ ਨੂੰ ਪ੍ਰਭਾਵਿਤ ਕਰਦਾ ਹੈ।
ਲੋਕ ਗਰਮੀ ਕਾਰਨ ਥਕਾਵਟ ਤੋਂ ਹੀਟਸਟ੍ਰੋਕ ਤੱਕ ਜਾ ਸਕਦੇ ਹਨ, ਜਿਸਦੇ ਨਤੀਜੇ ਵਜੋਂ ਸਥਾਈ ਅਪੰਗਤਾ ਜਾਂ ਮੌਤ ਹੋ ਸਕਦੀ ਹੈ।
ਹੀਟਸਟ੍ਰੋਕ ਦਾ ਮਤਲਬ ਹੈ ਕਿ ਵਿਅਕਤੀ ਦੇ ਦਿਮਾਗ ਦੀ ਕਾਰਗੁਜ਼ਾਰੀ ਪ੍ਰਭਾਵਿਤ ਹੋ ਰਹੀ ਹੈ। ਹੇਠ ਲਿਖੇ ਲੱਛਣਾਂ ਦੀ ਭਾਲ ਕਰੋ:
- ਉਲਝਣ ਜਾਂ ਚਿੜਚਿੜਾਹਟ
- ਬੇਮੇਲ ਬੋਲਚਾਲ
- ਅਸਧਾਰਨ ਤਰੀਕੇ ਨਾਲ ਚੱਲਣਾ
- ਦੌਰੇ ਪੈਣਾ ਜਾਂ ਅਸਮਰੱਥ ਹੋਣਾ ਜਾਂ ਬੇਹੋਸ਼ ਹੋਣਾ।
ਹੀਟਸਟ੍ਰੋਕ ਦੀਆਂ ਨਿਸ਼ਾਨੀਆਂ ਅਤੇ ਲੱਛਣਾਂ ਵਿੱਚ ਇਹ ਵੀ ਸ਼ਾਮਲ ਹਨ:
- ਚੱਕਰ ਆਉਣਾ
- ਜੀ ਕੱਚਾ ਹੋਣਾ ਅਤੇ ਉਲਟੀਆਂ
- ਸਿਰ ਦਰਦ
- ਬਹੁਤ ਜ਼ਿਆਦਾ ਪਿਆਸ
- ਉਨੀਂਦਰਾ
- ਸਰੀਰ ਦਾ ਬਹੁਤ ਜ਼ਿਆਦਾ ਤਾਪਮਾਨ
- ਲਾਲ, ਗਰਮ, ਖੁਸ਼ਕ ਚਮੜੀ
- ਜ਼ੁਬਾਨ ਸੁੱਕਣਾ
- ਤੇਜ਼ ਸਾਹ ਲੈਣਾ
- ਮਾਸਪੇਸ਼ੀਆਂ ਦਾ ਫੜਕਣਾ।
ਹੀਟਸਟ੍ਰੋਕ ਇੱਕ ਡਾਕਟਰੀ ਐਮਰਜੈਂਸੀ ਹੈ ਅਤੇ ਇਸ ਲਈ ਤੁਰੰਤ ਧਿਆਨ ਦੇਣ ਦੀ ਲੋੜ ਹੁੰਦੀ ਹੈ:
- ਐਂਬੂਲੈਂਸ ਲਈ ਤੁਰੰਤ ਟ੍ਰਿਪਲ ਜ਼ੀਰੋ (000) 'ਤੇ ਫ਼ੋਨ ਕਰੋ।
- ਉਸ ਵਿਅਕਤੀ ਨੂੰ ਕਿਸੇ ਠੰਢੀ ਜਗ੍ਹਾ 'ਤੇ ਲਿਟਾਓ। ਕਿਸੇ ਨੂੰ ਉਸ ਵਿਅਕਤੀ ਦੇ ਨਾਲ ਰਹਿਣ ਲਈ ਕਹੋ।
- ਵਾਧੂ ਕੱਪੜੇ ਉਤਾਰ ਦਿਓ ਜਾਂ ਤੰਗ ਕੱਪੜੇ ਢਿੱਲੇ ਕਰ ਦਿਓ।
- ਠੰਢੇ ਪਾਣੀ ਦਾ ਛਿੜਕਾਅ ਕਰਕੇ ਉਸ ਵਿਅਕਤੀ ਨੂੰ ਠੰਢਾ ਕਰੋ; ਸਰੀਰ ਨੂੰ ਠੰਢੀ, ਗਿੱਲੀ ਸਪੰਜ ਜਾਂ ਕੱਪੜਾ ਲਗਾਓ; ਅਤੇ ਗਰਦਨ, ਕੂਲ੍ਹਿਆਂ ਜਾਂ ਕੱਛਾਂ ਵਿੱਚ ਗਿੱਲੇ ਤੌਲੀਏ ਵਿੱਚ ਆਈਸ ਪੈਕ ਜਾਂ ਕੁਚਲੀ ਹੋਈ ਬਰਫ਼ ਲਗਾਓ। ਜੇਕਰ ਸੰਭਵ ਹੋਵੇ ਤਾਂ ਵਿਅਕਤੀ ਨੂੰ ਪੱਖਾ ਲਗਾਓ।
- ਜੇਕਰ ਉਹ ਵਿਅਕਤੀ ਪੂਰੀ ਤਰ੍ਹਾਂ ਹੋਸ਼ ਵਿੱਚ ਹੈ ਅਤੇ ਨਿਗਲ ਸਕਦਾ ਹੈ, ਤਾਂ ਉਸਨੂੰ ਪੀਣ ਲਈ ਠੰਢਾ ਪਾਣੀ ਦਿਓ।
- ਜੇਕਰ ਉਹ ਵਿਅਕਤੀ ਬੇਹੋਸ਼ ਹੈ, ਤਾਂ ਉਸਨੂੰ ਰਿਕਵਰੀ ਪੋਜੀਸ਼ਨ ਵਿੱਚ ਉਸਦੇ ਖੱਬੇ ਪਾਸੇ ਲਿਟਾਓ ਅਤੇ ਯਕੀਨੀ ਬਣਾਓ ਕਿ ਉਹ ਸਧਾਰਨ ਤਰੀਕੇ ਨਾਲ ਸਾਹ ਲੈ ਰਿਹਾ ਹੈ। ਜੇਕਰ ਲੋੜ ਹੋਵੇ, ਤਾਂ CPR ਕਰੋ। ਐਂਬੂਲੈਂਸ ਦੇ ਆਉਣ ਦੀ ਉਡੀਕ ਕਰੋ, ਜੋ ਉਸ ਵਿਅਕਤੀ ਨੂੰ ਤੁਰੰਤ ਹਸਪਤਾਲ ਲੈ ਜਾਵੇਗੀ।
ਗਰਮੀ ਕਾਰਨ ਪਿੱਤ ਨਿੱਕਲਣਾ (ਹੀਟ ਰੈਸ਼)
ਪਿੱਤ ਨਿੱਕਲਣਾ, ਜਿਸਨੂੰ ਪ੍ਰਿਕਲੀ ਹੀਟ ਵੀ ਕਿਹਾ ਜਾਂਦਾ ਹੈ, ਇੱਕ ਖਾਰਸ਼ ਵਾਲੀ ਚਮੜੀ ਦੀ ਜਲਣ ਹੈ ਜੋ ਬੱਚਿਆਂ ਅਤੇ ਨਵਜੰਮੇ ਬੱਚਿਆਂ ਵਿੱਚ ਸਭ ਤੋਂ ਆਮ ਹੁੰਦੀ ਹੈ।
ਪਿੱਤ ਦੇ ਗਰਦਨ, ਛਾਤੀ ਦੇ ਉੱਪਰਲੇ ਹਿੱਸੇ, ਲੱਕ, ਕੂਲ੍ਹਿਆ ਵਿੱਚ, ਛਾਤੀਆਂ ਦੇ ਹੇਠਾਂ, ਅਤੇ ਚਮੜੀ ਦੀਆਂ ਤੈਹਾਂ ਅਤੇ ਕੱਛਾਂ ਵਿੱਚ ਨਿੱਕਲਣ ਦੀ ਸੰਭਾਵਨਾ ਸਭ ਤੋਂ ਵੱਧ ਹੁੰਦੀ ਹੈ।
ਪਿੱਤ ਨਿੱਕਲਣ ਦੇ ਲੱਛਣਾਂ ਵਿੱਚ ਲਾਲੀ, ਹਲਕੀ ਸੋਜ਼, ਅਤੇ ਪ੍ਰਭਾਵਿਤ ਹਿੱਸੇ ਵਿੱਚ ਛੋਟੇ-ਛੋਟੇ ਲਾਲ ਧੱਬਿਆਂ ਦਾ ਝੁੰਡ ਸ਼ਾਮਲ ਹੈ, ਜੋ ਕਿ ਖਾਰਸ਼ ਹੋਣ ਅਤੇ ਚੁਭਣ ਵਾਂਗ ਮਹਿਸੂਸ ਹੁੰਦਾ ਹੈ।
ਪਿੱਤ ਨਿੱਕਲਣ ਦੇ ਲੱਛਣ ਕਈ ਦਿਨਾਂ ਤੱਕ ਰਹਿ ਸਕਦੇ ਹਨ।
ਪਿੱਤ ਆਮ ਤੌਰ 'ਤੇ ਬਿਨਾਂ ਇਲਾਜ ਦੇ ਆਪਣੇ ਆਪ ਠੀਕ ਹੋ ਜਾਂਦੀ ਹੈ। ਪਿੱਤ ਨਿੱਕਲਣ ਤੋਂ ਬਚਾਅ ਕਰਨ ਅਤੇ ਇਸਨੂੰ ਜਲਦੀ ਠੀਕ ਕਰਨ ਵਿੱਚ ਮੱਦਦ ਕਰਨ ਲਈ ਤੁਸੀਂ ਇਹ ਕਰ ਸਕਦੇ ਹੋ:
- ਠੰਢੇ ਹੋਣ ਅਤੇ ਪਸੀਨਾ ਰੋਕਣ ਲਈ ਕਿਸੇ ਠੰਢੀ ਅਤੇ ਚੰਗੀ ਤਰ੍ਹਾਂ ਹਵਾਦਾਰ, ਘੱਟ ਨਮੀ ਵਾਲੇ ਥਾਂ ਵਿੱਚ ਚਲੇ ਜਾਓ।
- ਪ੍ਰਭਾਵਿਤ ਥਾਂ ਨੂੰ ਸੁੱਕਾ ਰੱਖੋ।
- ਬਹੁਤ ਜ਼ਿਆਦਾ ਗਰਮੀ ਹੋਣ ਤੋਂ ਬਚਣ ਅਤੇ ਚਮੜੀ ਨੂੰ ਜਲਣ ਵਾਲੇ ਖੁਰਚਣ ਵਾਲੇ ਕੱਪੜਿਆਂ ਤੋਂ ਬਚਣ ਲਈ ਢਿੱਲੇ ਸੂਤੀ ਕੱਪੜੇ ਪਾਓ।
ਜੇਕਰ ਲੱਛਣ ਠੀਕ ਨਾ ਹੋਣ ਤਾਂ ਹੋਰ ਡਾਕਟਰੀ ਦੇਖਭਾਲ ਲਓ। ਆਪਣੇ GP ਨੂੰ ਮਿਲੋ ਜਾਂ 24 ਘੰਟੇ ਉਪਲਬਧ ਸਿਹਤ ਸਲਾਹ ਲਈ ਨਰਸ-ਔਨ-ਕਾਲ ਨੂੰ 1300 60 60 24 'ਤੇ ਫ਼ੋਨ ਕਰੋ ਜਾਂ ਫਾਰਮਾਸਿਸਟ ਨਾਲ ਗੱਲ ਕਰੋ।
ਮੌਜੂਦਾ ਡਾਕਟਰੀ ਸਮੱਸਿਆਵਾਂ ਦਾ ਹੋਰ ਵਿਗੜਨਾ
ਬਹੁਤ ਜ਼ਿਆਦਾ ਗਰਮੀ ਮੌਜੂਦਾ ਸਿਹਤ ਸਮੱਸਿਆਵਾਂ ਨੂੰ ਹੋਰ ਵਧਾ ਸਕਦੀ ਹੈ। ਜੋ ਸਮੱਸਿਆਵਾਂ ਗਰਮੀ ਕਾਰਨ ਪੈਦਾ ਹੋ ਸਕਦੀਆਂ ਹਨ ਜਾਂ ਹੋਰ ਖ਼ਰਾਬ ਹੋ ਸਕਦੀਆਂ ਹਨ, ਉਹਨਾਂ ਵਿੱਚ ਸ਼ਾਮਲ ਹਨ:
- ਦਿਲ ਦਾ ਦੌਰਾ
- ਦਿਮਾਗ ਦਾ ਦੌਰਾ
- ਗੁਰਦੇ ਦੀਆਂ ਸਮੱਸਿਆਵਾਂ
- ਦਮਾ ਰੋਗ ਅਤੇ ਸਾਹ ਦੀਆਂ ਹੋਰ ਬਿਮਾਰੀਆਂ (ਖ਼ਾਸ ਕਰਕੇ ਜਦੋਂ ਹਵਾ ਵਿੱਚ ਪ੍ਰਦੂਸ਼ਣ ਜਾਂ ਧੂੰਆਂ ਮੌਜੂਦ ਹੋਵੇ)
- ਮਾਨਸਿਕ ਬਿਮਾਰੀਆਂ ਦਾ ਵਧਣਾ।
ਮੱਦਦ ਕਿੱਥੋਂ ਪ੍ਰਾਪਤ ਕਰਨੀ ਹੈ
- ਐਮਰਜੈਂਸੀ ਵਿੱਚ, ਟ੍ਰਿਪਲ ਜ਼ੀਰੋ (000) 'ਤੇ ਫ਼ੋਨ ਕਰੋ।
- ਅਨੁਵਾਦ ਅਤੇ ਦੁਭਾਸ਼ੀਆ ਸੇਵਾ (TIS ਨੈਸ਼ਨਲ) ਦੂਜੀਆਂ ਭਾਸ਼ਾਵਾਂ ਬੋਲਣ ਵਾਲੇ ਲੋਕਾਂ ਲਈ (24 ਘੰਟੇ, ਹਫ਼ਤੇ ਦੇ 7 ਦਿਨ) ਉਪਲਬਧ ਹੈ। 131 450 'ਤੇ ਫ਼ੋਨ ਕਰੋ।
- ਤੁਹਾਡਾ GP (ਡਾਕਟਰ) – ਜੇਕਰ ਤੁਹਾਨੂੰ ਜਾਂ ਤੁਹਾਡੇ ਜਾਣਕਾਰ ਕਿਸੇ ਵਿਅਕਤੀ ਨੂੰ ਗਰਮੀ ਨਾਲ ਸੰਬੰਧਿਤ ਬਿਮਾਰੀ ਹੋ ਜਾਵੇ।
- ਨਰਸ-ਔਨ-ਕਾਲ ਟੈਲੀਫ਼ੋਨ: 1300 60 60 24 - ਮਾਹਰ ਸਿਹਤ ਜਾਣਕਾਰੀ ਅਤੇ ਸਲਾਹ ਲਈ (24 ਘੰਟੇ, 7 ਦਿਨ)
- ਵਿਕਟੋਰੀਆ ਦੇ ਵਰਚੁਅਲ ਐਮਰਜੈਂਸੀ ਵਿਭਾਗਨਾਲ ਗ਼ੈਰ-ਜਾਨਲੇਵਾ ਐਮਰਜੈਂਸੀਆਂ ਲਈ ਸੰਪਰਕ ਕਰੋ
- ਮੈਟਰਨਲ ਐਂਡ ਚਾਈਲਡ ਹੈਲਥ ਲਾਈਨ, ਵਿਕਟੋਰੀਆ ਟੈਲੀਫ਼ੋਨ 132 229 (24 ਘੰਟੇ, 7 ਦਿਨ)
- ਸੇਂਟ ਜੌਨ ਐਂਬੂਲੈਂਸ ਆਸਟ੍ਰੇਲੀਆ - ਮੁੱਢਲੀ ਸਹਾਇਤਾ ਅਤੇ ਸਰੋਤਾਂ ਬਾਰੇ ਜਾਣਕਾਰੀ ਲਈ
- ਹੈਲਥ ਟ੍ਰਾਂਸਲੇਸ਼ਨ ਡਾਇਰੈਕਟਰੀ - ਭਾਈਚਾਰਕ ਭਾਸ਼ਾਵਾਂ ਵਿੱਚ ਬਹੁਤ ਜ਼ਿਆਦਾ ਗਰਮੀ ਨਾਲ ਜੁੜੀ ਜਾਣਕਾਰੀ ਲਈ।
- Extreme heat and heatwaves, Department of Health, Victorian Government.
- Extreme heat, US Centers for Disease Control and Prevention.
- Hot weather, Sports Medicine Australia.
This page has been produced in consultation with and approved by:
