Здравствени проблеми поврзани со жешкото време (Heat-related health problems - Macedonian)

English

Здравствени проблеми поврзани со жешкото време

Жештината убива повеќе Австралијци од која било друга природна катастрофа.

Жештината може да предизвика сериозни и потенцијално смртоносни здравствени проблеми како што се топлотна исцрпеност и топлотен удар, да предизвика ненадејни настани како срцев удар или мозочен удар или да ги влоши постоечките здравствени состојби, како што се заболувања на бубрезите или белите дробови и ментални заболувања.

Луѓето кои се повеќе изложени на ризик од здравствени проблеми поврзани со топлината

Горештините може да влијаат на секого. Оние кои се повеќе изложени на ризик од здравствени проблеми поврзани со топлината се:

• Луѓе над 65 години
• Бебиња и мали деца
• бремени жени
• Луѓе со постоечки медицински состојби, како што се срцеви заболувања, заболувања на бубрезите, дијабетес или ментални заболувања
• Луѓе кои примаат одредени лекови, вклучувајќи диуретици (таблети за исфрлање течности) и лекови со антихолинергични својства
• Луѓе кои работат или вежбаат на отворено
• Луѓе кои се социјално изолирани или живеат сами
• Луѓе со ограничени начини да се разладат или живеат во згради што лесно се загреваат
• Бездомни лица.

Причини за здравствени проблеми поврзани со топлината

Здравствените проблеми поврзани со топлината се јавуваат кога нашите тела се прегреваат или дехидрираат преку потење, или и двете.

Заштитните мерки како што се разладување и пиење доволно вода можат да го намалат ризикот од здравствени проблеми поврзани со топлината.

За повеќе информации, погледнете ја страницата „Како да останете безбедни за време на горештини“.

Симптоми и прва помош за здравствени проблеми поврзани со топлина

Важно е да се знаат знаците и симптомите на здравствените проблеми поврзани со топлината и како да се реагира.

Започнете прва помош и веднаш побарајте медицинска помош ако некој покаже знаци на топлотна исцрпеност, топлотен удар или друга итна здравствена состојба.

Дехидрација

Дехидрацијата се јавува кога телото нема доволно течности за да ги извршува своите нормални функции.

Знаците и симптомите вклучуваат:

• жед
• сува уста
• вртоглавица или главоболка
• летаргија или замор
• тешкотии со јасно размислување
• мокрење помалку од вообичаеното
• темна урина или урина со силен мирис.

Првата помош за дехидрација предизвикана од топлина вклучува:

• Преместување на ладно место и одмарање.
• Пиење на многу вода.
• Соблекување на облеката и навлажнување на кожата со ладна вода.
• Пиење на многу вода.

Доколку симптомите не се подобрат, лицето може да го посети својот матичен лекар (GP) или да се јави на Nurse-On-Call на 1300 60 60 24 за 24-часовна телефонска линија за здравствен совет или да го контактира Виртуелниот оддел за итни случаи на Викторија (Victorian Virtual Emergency Department).

Грчеви предизвикани од топлина

Грчеви предизвикани од топлина се јавуваат кога телото губи сол и вода поради прекумерно потење и физичка активност. Грчевите предизвикани од топлина може да бидат и симптом на топлотна исцрпеност.

Симптомите вклучуваат болки или спазми во мускулите, обично во стомакот, рацете или нозете.

Првата помош за грчеви предизвикани од топлина вклучува:

• Застанување на сите активности.
• Одмарање во ладно или засенето место со потпрени нозе или малку подигнати нозе.
• Пиење на ладна вода.
• Одмарање за неколку часа пред повторното започнување на активности.

Доколку симптомите не се подобрат, побарајте медицинска помош. Посетете го вашиот матичен лекар (GP) или јавете се на Nurse-on-Call на 1300 60 60 24 за здравствени совети, 24 часа на ден.

Топлотна исцрпеност

Топлотната исцрпеност се јавува кога телото се прегрева и дехидрира, обично поради прекумерно потење или физичка активност. Тоа е сериозна состојба што може да се развие во топлотен удар.

Знаците и симптомите на топлотна исцрпеност вклучуваат:

• чувство на жед или раздразливост
• слабост или чувство на зашеметеност
• вртоглавица, главоболка
• лошење и повраќање
• грчеви во мускулите
• обилно потење
• побледување
• мокрење помалку од вообичаеното.

Првата помош за топлотна исцрпеност вклучува:

• Легнување и одмарање на ладно место со потпрени нозе кои се малку подигнати.
• Отстранување на вишокот облека или олабавување на тесната облека.
• Изладување на лицето со спреј со ладна вода; нанесете ладен, влажен сунѓер или крпа; и нанесете облога со мраз или кршен мраз во влажен пешкир на вратот, препоните или под мишките. Ладење на засегнатото лице ако е можно. Доколку лицето може, треба да се истушира со ладна вода или да седи во када со ладна вода.
• Поттикнување на чести голтки ладна вода ако лицето не повраќа.

Доколку симптомите не се подобрат, побарајте медицинска помош. Посетете го матичниот лекар, контактирајте го Виртуелниот оддел за итни случаи на Викторија (Victorian Virtual Emergency Department) или отидете во одделот за итна помош (emergency department).

Доколку симптомите се влошат или сте загрижени за топлотен удар, јавете се на три нули (Triple Zero - 000).

Топлотен удар

Топлотниот удар е сериозен и потенцијално смртоносен здравствен проблем што се јавува кога телото се прегрева до опасни нивоа и се нарушува функцијата на органите.

Кај луѓето топлотната исцрпеност може да се развие во топлотен удар, што може да резултира во трајна попреченост или смрт.

Топлотниот удар значи дека функционирањето на мозокот е засегнато. Внимавајте на какви било знаци на:

• збунетост или возбуда
• неповрзан говор
• абнормално одење
• напади или нарушена свест или губење на свеста.

Знаците и симптомите на топлотен удар, исто така, вклучуваат:

• вртоглавица
• лошење и повраќање
• главоболка
• интензивна жед
• поспаност
• многу висока телесна температура
• црвена, топла, сува кожа
• сув јазик
• брзо дишење
• грчење на мускулите.

Топлотниот удар е итен медицински случај и бара итна помош:

• Веднаш јавете се на три нули (Triple Zero - 000) за брза помош.
• Засегнатото лице нека легне на ладно место. Нека остане некој покрај лицето.
• Отстранување на вишокот облека или олабавување на тесната облека.
• Изладете го лицето со спреј со ладна вода; нанесете ладен, влажен сунѓер или крпа; и нанесете облога со мраз или кршен мраз во влажен пешкир на вратот, препоните или пазувите. Ладење на засегнатото лице ако е можно.
• Дајте му на лицето да пие ладна вода ако е целосно свесно и може да голта.
• Доколку лицето е во несвест, поставете го на неговата лева страна во положбата за опоравување и осигурајте се дека дише нормално. Доколку е потребно, извршете кардиопулмонална реанимација (CPR). Почекајте брзата помош итно да го однесе лицето во болница

Осип предизвикан од топлина

Осип предизвикан од топлина, познат и како „prickly heat“ (боцкава топлина), е јадеж и иритација на кожата што најчесто се јавува кај бебиња и мали деца.

Осип од топлина најчесто се појавува на вратот, горниот дел од градите, половината, во препоните, под градите, како и во кожните набори и под мишките.

Симптомите на осип од топлина вклучуваат црвенило, благ оток и група мали црвени точки во засегнатото место, поврзани со чешање и чувство на боцкање.

Симптомите на осип од топлина може да траат неколку дена.

Осипот од топлина обично исчезнува без третман. За да спречите осип од топлина и да помогнете побрзо да се реши, можете да:

• Се преместите во постудена и добро проветрена, помалку влажна средина за да се разладите и да престанете да се потите.
• Го чувате засегнатото место суво.
• Носете лабава памучна облека за да спречите прегревање и да избегнувате груби ткаенини кои ја иритираат кожата.

Доколку симптомите не се подобрат, побарајте дополнителна медицинска помош. Посетете го матичниот лекар, јавете се на Nurse-on-Call на 1300 60 60 24 за 24-часовен здравствен совет или побарајте совет од фармацевт.

Влошување на постоечките медицински состојби

Горештините може да ги влошат постојните здравствени проблеми. Здравствени состојби што можат да бидат предизвикани или влошени од жештина вклучуваат:

• Срцев удар
• Мозочен удар
• Проблеми со бубрезите
• Астма и други респираторни заболувања (особено во присуство на загадување на воздухот или чад)
• Влошување на менталната болест.

Каде да побарате помош

• Во итен случај, јавете се на три нули (000)
• Службата за писмено и усно преведување (TIS National) е достапна (24 часа, 7 дена во неделата) за повикувачи кои зборуваат други јазици. Јавете се на 131 450.
• Вашиот матичен лекар – ако вие или некој што го познавате можеби страда од болест поврзана со топлина
• Nurse-on-Call Тел. 1300 60 60 24 – за стручни здравствени информации и совети (24 часа, 7 дена во неделата)
• Контактирајте го Виртуелниот оддел за итни случаи на Викторија (Victorian Virtual Emergency Department) – за итни случаи кои не се опасни по живот
• Линија за здравјето на мајките и децата (Maternal and Child Health Line), Викторија Тел. 132 229 (24 часа, 7 дена во неделата)
• Службата за брза помош St John Ambulance Australia – за информации и материјали за прва помош
• Именик за здравствени преводи (Health Translations Directory) – информации за горештини на јазиците на заедницата.