ܡܲܪܥܵܐ ܕܐܲܣܡܵܐ ܕܥܲܠܥܵܠܵܐ (Thunderstorm asthma - Assyrian)

ܝܠܘܿܦܘܼܢ ܒܘܼܬ ܙܘܼܗܵܪܹܐ، ܢܝܼܫܲܢܩܹܐ ܘܕܲܪܡܲܢܝܵܬܹܐ ܕܡܲܪܥܵܐ ܕܐܲܣܡܵܐ ܕܥܲܠܥܵܠܵܐ݂ ܗܘܹܝܡܘܼܢ ܗܵܙܹܪ ܒܐܵܗܵܐ ܐܲܩܡܵܐ ܕܕܸܩܬܵܐ ܕܒܲܪܙܲܪܥܵܐ ܕܓܸܠܵܐ.

English

ܡܘܿܕܝܼ ܝܠܹܗ ܡܲܪܥܵܐ ܕܐܲܣܡܵܐ ܕܥܲܠܥܵܠܵܐ؟

ܓܵܘ ܒܼܸܟܬܘܿܪܝܵܐ، ܐܲܩܡܵܐ ܕܕܸܩܬܵܐ ܕܒܲܪܙܲܪܥܵܐ ܕܓܸܠܵܐ ܥܝܵܕܵܐܝܼܬ ܟܹܐ ܡܲܓܪܸܫ ܡܼܢ 1 ܒܝܲܪܚܵܐ ܕܬܸܫܪܝܼܢ ܩܲܕܡܵܝܵܐ ܗܲܠ 31 ܒܝܲܪܚܵܐ ܕܟܵܢܘܼܢ ܩܲܕܡܵܝܵܐ ܒܡܸܬܚܵܐ ܕܐܲܝܵܐ ܥܸܕܵܢܵܐ، ܒܲܠܟܵܐ ܐܲܚܬܘܿܢ ܚܵܙܝܼܬܘܿܢ ܚܕܵܐ ܙܝܵܕܬܵܐ ܓܵܘ ܐܲܣܡܵܐ ܘܚܲܡܚܲܡܬܵܐ ܕܬܸܒܼܢܵܐ ܐܲܩܡܵܐ ܐܵܦ ܟܹܐ ܡܲܝܬܹܐ ܥܲܡܹܗ ܦܘܼܪܣܵܐ ܕܡܲܪܥܵܐ ܕܐܲܣܡܵܐ ܕܥܲܠܥܵܠܵܐ.

ܡܲܪܥܵܐ ܕܐܲܣܡܵܐ ܕܥܲܠܥܵܠܵܐ ܡܵܨܹܐ ܗܵܘܹܐ ܐܝܼܡܲܢ ܕܐܝܼܬ ܪܵܒܵܐ ܕܸܩܬܵܐ ܕܒܲܪܙܲܪܥܵܐ ܕܓܸܠܵܐ ܓܵܘ ܗܵܘܵܐ ܘܚܲܕ ܬܲܗܵܪܵܐ ܦܪܝܼܫܵܐ ܕܥܲܠܥܵܠܵܐ ܕܸܢܕܸܟܝܵܬܹܐ ܕܕܸܩܬܵܐ ܕܒܲܪܙܲܪܥܵܐ ܕܓܸܠܵܐ ܟܹܐ ܦܵܝܫܝܼ ܡܘܼܦܪܸܚܹܐ ܠܓܵܘ ܦܵܘܚܵܐ ܘܛܥܝܼܢܹܐ ܩܵܐ ܪܸܚܩܵܝܘܼܝܵܬܹܐ ܝܲܪܝܼܟܼܹܐ ܚܲܕܟܡܵܐ ܕܸܢܕܸܟܝܵܬܹܐ ܡܵܨܝܼ ܦܵܩܥܝܼ ܘܦܵܬܚܝܼ ܘܦܵܪܣܝܼ ܦܲܪܬܘܼܟܼܹܐ ܕܲܩܝܼܩܹܐ ܕܝܼܢܵܐ ܩܸܒܥܝܹܐ ܓܵܘ ܡܚܵܝܵܬܹܐ ܕܦܵܘܚܵܐ ܕܟܹܐ ܗܵܘܝ ܡܼܢ ܩܵܕ݉ܡ ܚܲܕ ܥܲܠܥܵܠܵܐ ܐܲܢܹܐ ܦܲܪܬܘܼܟܼܹܐ ܝܼܢܵܐ ܪܵܒܵܐ ܙܥܘܿܪܹܐ ܩܵܐ ܐ݉ܢܵܫܹܐ ܕܡܲܥܒܼܸܪܝܼ ܠܗܘܿܢ، ܒܫܩܵܠܬܵܐ ܕܢܲܦܲܣ، ܠܓܵܘ ܥܘܼܡܩܵܐ ܕܪܵܐܬܵܘܵܬܲܝܗܝ ܘܕܡܵܨܝܼ ܒܓ̰ܲܠܕܘܼܬܵܐ ܕܡܲܠܒܼܸܚܝܼ ܠܢܝܼܫܲܢܩܹܐ ܕܐܲܣܡܵܐ، ܐܵܦ ܓܵܘ ܐܵܢܝܼ ܐ݇ܢܵܫܹܐ ܕܠܵܐ ܝܠܵܗܿ ܗܘܝܼܬܲܝܗܝ ܐܲܣܡܵܐ ܡܼܢ ܩܵܕ݉ܡܬܵܐ.

ܐܝܼܡܲܢ ܕܪܵܒܵܐ ܐ݉ܢܵܫܹܐ ܗܵܘܹܐܠܗܘܿܢ ܢܝܼܫܲܢܩܹܐ ܕܐܲܣܡܵܐ ܓܵܘ ܚܲܕ ܡܸܬܚܵܐ ܟܸܪܝܵܐ ܕܥܸܕܵܢܵܐ ܒܥܸܕܵܢܵܐ ܕܐܲܢܹܐ ܐܲܝܟܲܢܘܵܬܹܐ، ܐܵܗܵܐ ܟܹܐ ܦܵܐܹܫ ܩܸܪܝܵܐ ܡܲܪܥܵܐ ܨܵܦܘܿܚܵܐ ܕܐܲܣܡܵܐ ܕܥܲܠܥܵܠܵܐ.

ܡܵܢܝܼ ܝܼܠܹܗ ܓܵܘ ܩܸܢܛܵܐ؟

ܐ݉ܢܵܫܹܐ ܕܝܼܢܵܐ ܓܵܘ ܩܸܢܛܵܐ ܕܡܲܪܥܵܐ ܕܐܲܣܡܵܐ ܕܥܲܠܥܵܠܵܐ ܒܸܚܒܼܵܫܵܐ ܝܢܵܐ ܐܵܢܝܼ ܕܐܝܼܬܠܗܘܿܢ ܐܲܣܡܵܐ ܗܵܕܝܼܵܐ ܝܲܢ ܒܕܲܥܒܼܲܪ، ܝܲܢ ܐܲܣܡܵܐ ܠܵܐ ܡܥܘܼܝܸܢܬܵܐ ܝܲܢ ܚܲܡܚܲܡܬܵܐ ܕܬܸܒܼܢܵܐ ܒܥܸܕܵܢܵܐ ܕܒܹܝܬ ܢܝܼܣܵܢܹܐ. ܩܸܢܛܵܐ ܝܼܠܹܗ ܐܵܦ ܒܘܼܫ ܙܵܘܕܵܐ ܩܵܐ ܐ݉ܢܵܫܹܐ ܕܐܝܼܬܠܗܘܿܢ ܬܸܪܘܲܝܗܝ ܐܲܣܡܵܐ ܕܚܲܡܚܲܡܬܵܐ ܕܬܸܒܼܢܵܐ، ܦܪܝܼܫܵܐܝܼܬ ܐܸܢ ܐܲܣܡܵܐ ܕܕܝܼܲܝܗܝ ܠܵܐ ܝܠܵܗܿ ܦܝܼܫܬܵܐ ܡܕܘܼܒܸܪܬܵܐ ܨܦܵܝܝܼ.

ܚܲܡܹܝܡܘܼܢ ܠܵܗܿ ܓܵܢܵܘܟܼܘܿܢ ܓܵܘ ܕܐܵܗܵܐ ܐܲܩܡܵܐ ܕܕܸܩܬܵܐ ܕܒܲܪܙܲܪܥܵܐ ܕܓܸܠܵܐ

ܐܲܚܬܘܿܢ ܡܵܨܝܼܬܘܿܢ ܚܲܡܝܼܬܘܿܢ ܠܵܗܿ ܓܵܢܵܘܟܼܘܿܢ ܘܐܵܢܝܼ ܕܝܼܬܘܿܢ ܡܲܣܘܼܡܹܐ ܒܵܠܵܐ ܐܸܠܲܝܗܝ ܒܬܒܵܥܬܵܐ ܠܐܲܢܹܐ ܦܵܣܘܿܥܝܵܬܹܐ ܦܫܝܼܛܹܐ (ܗܵܣܵܢܵܝ):

• ܡܲܪܗܹܝܡܘܼܢ ܥܲܝܢܵܐ ܥܲܠ ܫܸܡܥܵܐ ܗܵܘܵܝܵܐ ܕܩܸܢܛܵܐ ܕܡܲܪܥܵܐ ܨܵܦܘܿܚܵܐ ܕܐܲܣܡܵܐ ܕܥܲܠܥܵܠܵܐ:
  • ܣܲܚܒܸܪܘܼܢ ܠܫܲܘܦܵܐ ܐܹܠܸܟܬܪܘܿܢܵܝܵܐ ܕ Vic Emergency thunderstorm asthma forecast
  • ܡܵܨܠܹܝܡܘܼܢ ܠܬܘܼܠܚܵܡܵܐ ܕ VicEmergency app ܒܐܘܼܪܚܵܐ ܕ AppStore ܝܲܢ ܕ Google Play.
• ܠܵܐ ܗܵܘܝܼܬܘܿܢ ܓܵܘ ܕܘܼܟܵܢܹܐ ܦܬܝܼܚܹܐ ܒܥܸܕܵܢܵܐ ܕܥܲܠܥܵܠܵܐ، ܦܪܝܼܫܵܐܝܼܬ ܒܥܸܕܵܢܵܐ ܕܦܵܘܚܹܐ ܕܡܵܚܝܼ ܡܼܢ ܩܵܕ݉ܡ ܥܲܠܥܵܠܵܐ ܥܒܼܘܿܪܘܼܢ ܠܵܓܵܘܵܐ ܘܕܒܼܘܿܪܘܼܢ ܠܗܘܿܢ ܬܲܪܥܵܢܹܐ ܘܟܵܘܵܬܹܐ ܡܲܟ̰ܡܸܗܡܘܼܢ ܠܐܲܝܢܝܼ ܛܲܟܼܣܹܐ ܕܡܲܩܝܸܫܵܢܬܵܐ ܕܗܵܘܵܐ ܕܗܵܘܝܼ ܕܟܹܐ ܡܥܒܼܸܪܝܼ ܗܵܘܵܐ ܡܼܢ ܠܒܼܲܕܲܪ ܠܵܓܵܘܵܐ ܕܒܲܝܬܵܐ ܝܲܢ ܕܪܵܕܝܼܬܵܐ (ܒܸܚܒܼܵܫܵܐ ܡܲܩܝܸܫܵܢܝܵܬܹܐ ܕܗܵܘܵܐ ܗܵܘܓܵܝܵܐ).
• ܫܩܘܿܠܘܼܢ ܠܕܲܪܡܵܢܵܘܟܼܘܿܢ ܚܲܡܝܵܢܵܐ ܐܲܝܟܼ ܕܦܝܫܵܐ ܝܠܹܗ ܦܩܝܼܕܵܐ.
• ܝܠܘܿܦܘܼܢ ܕܵܐܟܼܝܼ ܠܡܕܲܒܘܼܪܹܐ ܚܕܵܐ ܡܚܵܝܬܵܐ ܕܐܲܣܡܵܐ ܬܒܘܿܥܘܼܢ ܠܚܘܼܛܵܛܵܐ ܕܡܕܲܒܲܪܬܵܐ ܕܐܲܣܡܵܐ ܕܕܝܼܵܘܟܼܘܿܢ ܝܲܢ ܡܲܦܠܸܚܘܼܢ ܕܲܪܡܲܢܬܵܐ ܩܲܕܡܵܝܬܵܐ ܕܐܲܣܡܵܐ.

ܐܲܣܡܵܐ

• ܐܸܢ ܐܲܚܬܘܿܢ ܐܝܼܬܠܵܘܟܼܘܿܢ ܡܲܪܥܵܐ ܕܐܲܣܡܵܐ ــ ܗܲܡܙܸܡܘܼܢ ܥܲܡ ܐܵܣܝܵܐ ܕܒܲܝܬܘܼܬܵܘܟܼܘܿܢ (GP) ܠܨܲܚܨܘܼܝܹܐ ܡܕܲܒܲܪܬܵܐ ܕܐܲܣܡܵܐ ܕܕܝܼܵܘܟܼܘܿܢ، ܘܠܥܒܼܵܕܬܵܐ ܕܚܕܵܐ ܬܢܵܝܬܵܐ ܕܓܲܫܲܩܬܵܐ ܘܚܲܕܲܬܵܐ ܠܚܘܼܛܵܛܵܐ ܕܡܕܲܒܲܪܬܵܐ ܕܐܲܣܡܵܐ ܕܕܝܼܵܘܟܼܘܿܢ ܠܐܲܟܘܼܕܹܐ ܕܐܲܚܬܘܿܢ ܐܝܼܬܠܵܘܟܼܘܿܢ ܗܿܘ ܕܲܪܡܵܢܵܐ ܠܚܝܼܡܵܐ ܩܵܐ ܐܲܣܡܵܐ ܕܕܝܼܵܘܟܼܘܿܢ ܘܠܨܲܚܨܘܼܝܹܐ ܕܐܸܢ ܐܲܚܬܘܿܢ ܡܲܦܠܘܼܚܹܐ ܝܬܘܿܢ ܒܐܘܼܪܚܵܐ ܬܪܝܼܨܬܵܐ ܕܟܼܘܿܪܘܼܢ، ܫܩܵܠܬܵܐ ܕܚܲܕ ܡܲܟܠܝܵܢܵܐ ܕܐܲܣܡܵܐ ܐܲܝܟܼ ܕܦܝܼܫܵܐ ܝܠܹܗ ܦܩܝܼܕܵܐ ܝܼܠܵܗܿ ܪܵܒܵܐ ܐܵܢܲܢܩܵܝܬܵܐ ܡܲܟܠܸܝܵܢܵܐ ܟܹܐ ܗܲܝܸܪ ܒܡܲܟܠܲܝܬܵܐ ܕܢܝܼܫܲܢܩܹܐ ܕܐܲܣܡܵܐ، ܒܸܚܒܼܵܫܵܐ ܡܲܪܥܵܐ ܕܐܲܣܡܵܐ ܕܥܲܠܥܵܠܵܐ.
• ܐܸܢ ܐܲܚܬܘܿܢ ܗܸܟ̰ ܗܘܸܝܵܘܟ݂ܘܿܢ ܝܼܠܹܗ ܡܲܪܥܵܐ ܕܐܲܣܡܵܐ ܒܕܲܥܒ݂ܵܪ ــ ܗܲܡܙܸܡܘܼܢ ܥܲܡ ܐܵܣܝܵܐ ܕܒܲܝܬܘܼܬܵܘܟ݂ܘܿܢ (GP) ܒܘܼܬ ܚܲܡܲܝܬܵܐ ܕܓܵܢܵܘܟܼܘܿܢ ܡܼܢ ܩܸܢܛܵܐ ܕܡܲܪܥܵܐ ܕܐܲܣܡܵܐ ܕܥܲܠܥܵܠܵܐ.
• ܐܸܢ ܐܲܚܬܘܿܢ ܐܝܼܬܠܵܘܟܼܘܿܢ ܗܘܝܼܬܵܐ ܚܲܣܚܲܣܬܵܐ ܕܨܲܕܪܵܐ، ܟܲܪܝܘܼܬܵܐ ܕܫܩܵܠܵܐ ܢܲܦܲܣ، ܚܠܵܨܬܵܐ ܕܨܲܕܪܵܐ، ܝܲܢ ܚܲܕ ܫܥܵܠܵܐ ܠܵܐ ܟܵܠܝܵܢܵܐ ــ ܗܲܡܙܸܡܘܼܢ ܥܲܡ ܐܵܣܝܵܐ ܕܒܲܝܬܘܼܬܵܘܟܼܘܿܢ (GP) ܐܵܢܝܼ ܡܵܨܝܼ ܕܗܲܝܸܪܝܼ ܠܵܘܟܼܘܿܢ ܕܝܵܕܥܝܼܬܘܿܢ ܕܐܸܢ ܐܝܼܬܠܵܘܟܼܘܿܢ ܐܲܣܡܵܐ ܘܕܵܐܟܼܝܼ ܠܡܕܲܒܘܼܪܲܝܗܝ ܐܵܢܝܼ ܢܝܼܫܲܢܩܹܐ.
• ܐܲܡܝܼܢܵܐܝܼܬ ܗܵܘܹܐ ܥܲܡܵܘܟܼܘܿܢ ܕܲܪܡܵܢܵܘܟܼܘܿܢ ܡܲܢܝܸܚܵܢܵܐ ــ ܐܵܗܵܐ ܝܼܠܹܗ ܕܲܪܡܵܢܵܘܟܼܘܿܢ ܕܕܲܪܡܲܢܬܵܐ ܩܲܕܡܵܝܬܵܐ ܕܐܲܣܡܵܐ ܒܥܸܕܵܢܵܐ ܕܥܪܝܼܨܘܼܬܵܐ (ܐܵܗܘܵܠ ܕܡܲܠܝܲܙܬܵܐ).

ܩܵܐ ܢܝܼܫܲܢܩܹܐ ܡܲܟܝܼܟܼܹܐ ܕܐܲܣܡܵܐ، ܚܙܹܝܡܘܼܢ ܠܐܵܣܝܵܐ ܕܒܲܝܬܘܼܬܵܘܟܼܘܿܢ (GP)، ܗܲܡܙܸܡܘܼܢ ܥܲܡ ܚܲܕ ܨܲܝܕܲܠܵܝܵܐ ܝܲܢ ܡܛܹܝܡܘܼܢ ܠܓܘܼܒܵܝܹܐ ܐ݉ܚܹܪ݉ܢܹܐ ܕܡܲܣܲܡܬܵܐ ܕܒܵܠܵܐ. ܐܸܢ ܐܲܝܟܲܢܵܝܘܼܬܵܘܟܼܘܿܢ ܠܵܐ ܝܠܵܗ̇ ܒܸܗܘܵܝܵܐ ܒܘܼܫ ܨܦܵܝܝܼ ܝܲܢ ܒܸܗܘܵܝܵܐ ܝܠܵܗ̇ ܒܘܼܫ ܚܸܪܒܵܐ، ܡܲܚܒܸܪܘܼܢ ܩܵܐ ܬܠܵܬܵܐ ܨܝܼܦܵܪܹܐ 000 ܝܲܢ ܪܚܘܿܫܘܼܢ ܠܒܹܝܬ ܟܪܝܼܗܹܐ.

ܚܲܡܚܲܡܬܵܐ ܕܬܸܒܼܢܵܐ (Hay fever)

• ܐܸܢ ܐܲܚܬܘܿܢ ܐܝܼܬܠܵܘܟܼܘܿܢ ܚܲܡܚܲܡܬܵܐ ܕܬܸܒܼܢܵܐ ܕܥܸܕܵܢܵܐ ܕܒܹܝܬ ܢܝܼܣܵܢܹܐ، ܗܲܡܙܸܡܘܼܢ ܥܲܡ ܨܲܝܕܲܠܵܝܵܘܟܼܘܿܢ ܝܲܢ ܐܵܣܝܵܐ ܕܒܲܝܬܘܼܬܵܘܟܼܘܿܢ (GP) ܐܵܢܝܼ ܡܵܨܝܼ ܗܲܝܸܪܝܼ ܠܵܘܟܼܘܿܢ ܕܥܵܒܼܕܝܼܬܘܿܢ ܠܵܘܟܼܘܿܢ ܚܲܕ ܚܘܼܛܵܛܵܐ ܕܕܲܪܡܲܢܬܵܐ ܕܚܲܡܚܲܡܬܵܐ ܕܬܸܒܼܢܵܐ ܘܡܵܨܝܼ ܡܲܚܫܸܚܝܼ ܐܘܼܪܚܵܬܹܐ ܠܚܲܡܘܼܝܘܿܗ̇ ܓܵܢܵܘܟܼܘܿܢ ܡܼܢ ܐܲܣܡܵܐ ܕܥܲܠܥܵܠܵܐ ܐܲܝܵܐ ܗܲܝܲܪܬܵܐ ܒܸܚܒܼܵܫܵܐ ܝܠܵܗܿ ܝܕܸܥܬܵܐ ܕܐܲܝܟܵܐ ܐܲܚܬܘܿܢ ܡܵܨܝܼܬܘܿܢ ܒܓ̰ܲܠܕܘܼܬܵܐ ܩܵܢܝܼܬܘܿܢ ܚܲܕ ܡܢܲܦܚܵܢܵܐ ܕܡܲܪܘܸܚܵܢܵܐ ܕܐܲܣܡܵܐ، ܐܸܢ ܩܲܡ ܗܵܘܹܐܠܵܘܟܼܘܿܢ ܐܲܣܡܵܐ ܕܥܲܠܥܵܠܵܐ ــ ܐܲܢܹܐ ܝܼܢܵܐ ܡܸܬܩܲܢܝܵܢܹܐ ܡܼܢ ܨܲܝܕܲܠܝܼܹܐ ܕܠܵܐ ܫܲܒܲܚܬܵܐ (ܟܬܵܒܼܬܵܐ) ܡܼܢ ܐܵܣܝܵܐ.
• ܐܸܢ ܐܲܚܬܘܿܢ ܩܲܡ ܗܵܘܹܐܠܵܘܟܼܘܿܢ ܢܝܼܫܲܢܩܹܐ ܕܐܲܣܡܵܐ، ܬܒܘܿܥܘܼܢ ܠܦܵܣܘܿܥܝܵܬܹܐ ܕܕܲܪܡܲܢܬܵܐ ܩܲܕܡܵܝܬܵܐ ܕܐܲܣܡܵܐ ܘܐܲܟܸܕܘܼܢ ܕܥܲܩܸܒܼܝܼܬܘܿܢ ܠܐܵܗܵܐ ܥܲܡ ܐܵܣܝܵܐ ܕܒܲܝܬܘܼܬܵܘܟܼܘܿܢ (GP).
• ܐܸܢ ܐܲܚܬܘܿܢ ܡܢܘܼܣܝܼܠܵܘܟܼܘܿܢ ܐܲܝܢܝܼ ܢܝܼܫܲܢܩܹܐ ܕܐܲܣܡܵܐ ܕܗܵܘܝܼ ܥܲܡ ܚܲܡܚܲܡܬܵܐ ܕܬܸܒܼܢܵܐ ܝܲܢ ܐܲܚܬܘܿܢ ܠܵܐ ܝܬܘܿܢ ܐܲܟܝܼܕܹܐ، ܚܙܹܝܡܘܼܢ ܠܹܗ ܐܵܣܝܵܐ ܕܒܲܝܬܘܼܬܵܘܟܼܘܿܢ (GP) ܐܝܼܡܲܢ ܕܚܕܵܐ ܡܥܲܝܲܢܬܵܐ ܦܝܼܫܬܵܐ ܝܠܵܗܿ ܥܒܼܝܼܕܬܵܐ ܐܲܚܬܘܿܢ ܡܵܨܝܼܬܘܿܢ ܩܵܢܝܼܬܘܿܢ ܕܲܪܡܲܢܬܵܐ ܡܲܥܒܕܵܢܬܵܐ (ܡܵܪܲܬ ܟܵܐܪ) ܕܒܸܕ ܫܵܒܼܩܵܐܠܵܘܟܼܘܿܢ ܕܪܵܓܼܫܝܼܬܘܿܢ ܘܫܵܩܠܝܼܬܘܿܢ ܢܲܦܲܣ ܒܘܼܫ ܨܦܵܝܝܼ.

ܕܲܪܡܲܢܬܵܐ ܩܲܕܡܵܝܬܵܐ ܕܐܲܣܡܵܐ

ܐܵܢܲܢܩܵܝܬܵܐ ܝܠܵܗܿ ܩܵܐ ܟܠܚܲܕ ܦܲܪܨܘܿܦܵܐ ܓܵܘ ܟܢܘܼܫܬܵܐ ܠܝܼܕܵܥܝܵܐ ܕܲܪܡܲܢܬܵܐ ܩܲܕܡܵܝܬܵܐ ܕܐܲܣܡܵܐ ܡܵܘܕܥܵܢܘܼܬܵܐ ܕܕܲܪܡܲܢܬܵܐ ܩܲܕܡܵܝܬܵܐ ܕܐܲܣܡܵܐ ܡܵܨܝܵܢܬܵܐ ܝܠܵܗܿ ܡܛܵܝܬܵܐ ܐܸܠܘܿܗܿ ܡܼܢ Better Health Channel، Asthma Australia ܘܡܼܢ National Asthma Council Australia.

ܡܲܚܒܸܪܘܼܢ ܩܵܐ ܬܠܵܬܵܐ ܨܝܼܦܵܪܹܐ (000) ܚܲܕܪܹܫܵܐ ܐܸܢ:

• ܦܲܪܨܘܿܦܵܐ ܠܵܐ ܝܠܹܗ ܒܸܫܩܵܠܵܐ ܢܲܦܲܣ
• ܐܲܣܡܵܐ ܕܕܝܼܲܝܗܝ ܡܼܢ ܢܵܓܸܣܬܲܢ ܒܸܗܘܵܝܵܐ ܝܠܵܗ̇ ܒܘܼܫ ܚܸܪܒܵܐ ܝܲܢ ܠܵܐ ܝܠܵܗܿ ܒܸܗܘܵܝܵܐ ܒܘܼܫ ܨܦܵܝܝܼ
• ܦܲܪܨܘܿܦܵܐ ܢܲܣܘܼܝܹܐ ܝܠܹܗ ܡܚܵܝܬܵܐ ܕܐܲܣܡܵܐ ܘܠܲܝܬ ܚܲܕ ܕܲܪܡܵܢܵܐ ܡܲܢܝܸܚܵܢܵܐ ܩܲܕ݇ܡ ܐܝܼܕܵܐ
• ܦܲܪܨܘܿܦܵܐ ܠܵܐ ܝܠܹܗ ܐܲܟܝܼܕܵܐ ܕܐܸܢ ܐܵܗܵܐ ܝܠܹܗ ܡܲܪܥܵܐ ܕܐܲܣܡܵܐ
• ܦܲܪܨܘܿܦܵܐ ܦܝܼܫܵܐ ܝܠܹܗ ܝܕܝܼܥܵܐ ܕܟܹܐ ܗܵܘܹܐܠܹܗ ܗܲܣܵܣܝܼܵܐ ܩܫܝܼܬܵܐ ܙܵܘܕܵܢܬܵܐ (anaphylaxis) ܐܸܢ ܐܲܝܵܐ ܝܼܠܵܗܿ ܐܲܝܟܲܢܵܝܘܼܬܵܐ ܕܦܲܪܨܘܿܦܵܐ، ܗܲܡܵܫܵܐ ܗܵܒܼܠܗܘܿܢ ܠܹܗ ܚܡܵܛܵܐ ܝܵܬܵܝܬܵܐ ܕ adrenaline ܩܲܕܡܵܝܬܵܐ، ܘܒܵܬ݉ܪ ܗܵܕܵܟܼ ܡܲܢܝܸܚܵܢܵܐ، ܐܵܦ ܐܸܢ ܠܲܝܬ ܢܝܼܫܲܢܩܹܐ ܠܓܸܠܕܵܐ.

ܠܡܛܵܝܵܐ ܠܐܲܝܵܐ ܡܵܘܕܥܵܢܘܼܬܵܐ ܒܠܸܫܵܢܹܐ ܐ݉ܚܹܪ݉ܢܹܐ ܡܲܚܒܸܪܘܼܢ ܚܸܠܡܲܬ ܕܬܵܪܓܲܡܬܵܐ ܘܕܦܲܫܲܩܬܵܐ (TIS National) ܥܲܠ ܡܸܢܝܵܢܵܐ 450 131 (ܡܲܚܒܲܪܬܵܐ ܡܲܓܵܢܵܝܬܵܐ) ܘܛܠܘܿܒܘܼܢ ܡܸܢܲܝܗܝ ܕܡܲܚܒܸܪܝܼ ܝܵܨܘܿܦܬܵܐ ܛܠܝܼܒܬܵܐ ܥܲܠ ܬܹܠܹܦ̮ܘܿܢ (Nurse on Call).

ܐܸܢ ܐܲܚܬܘܿܢ ܝܼܬܘܿܢ ܟܲܪܹܐ، ܝܲܢ ܟܹܐ ܫܵܡܥܝܼܬܘܿܢ ܒܥܲܣܩܘܼܬܵܐ، ܝܲܢ ܐܝܼܬܠܵܘܟܼܘܿܢ ܚܕܵܐ ܡܚܝܼܠܘܼܬܵܐ (ܙܲܒܘܼܢܘܼܬܵܐ) ܒܗܲܡܙܲܡܬܵܐ \ ܝܵܗܒܼܫܩܵܠܵܐ ܡܲܚܒܸܪܘܼܢ ܩܵܐ National Relay Service (NRS) ܘܛܠܘܿܒܘܼܢ ܡܸܢܲܝܗܝ ܕܡܲܚܒܸܪܝܼ ܩܵܐ ܝܵܨܘܿܦܬܵܐ ܛܠܝܼܒܬܵܐ ܥܲܠ ܬܹܠܹܦ̮ܘܿܢ (Nurse on Call).

ܡܲܘܕܥܵܢܘܼܬܵܐ ܐ݇ܚܝܵܢܵܝܬܵܐ

• ܫܲܘܦܵܐ ܕܦܲܐܬܵܐ ܕ Better Health Channel thunderstorm asthma
• Thunderstorm asthma forecast
• ܫܲܘܦܵܐ ܕܦܲܐܬܵܐ ܕ Melbourne Pollen ܝܲܢ ܬܘܼܠܚܵܡܵܐ (.app)
• Asthma Australia
• National Asthma Council Australia

ܐܲܝܟܵܐ ܠܩܢܵܝܵܐ ܗܲܝܲܪܬܵܐ

• ܒܥܸܕܵܢܵܐ ܕܚܕܵܐ ܥܪܝܼܨܘܼܬܵܐ (ܐܵܗܘܵܠ ܕܡܲܠܝܲܙܬܵܐ)، ܗܲܡܵܫܵܐ ܡܲܚܒܸܪܘܼܢ ܩܵܐ ܬܠܵܬܵܐ ܨܝܼܦܵܪܹܐ (000)
• ܚܸܠܡܲܬ ܥܪܝܼܨܬܵܐ ܕܡܲܣܲܡܬܵܐ ܕܒܵܠܵܐ ܓܵܘ ܒܼܸܟܬܘܿܪܝܵܐ (Urgent care services in Victoria)